Mp3 şələkə
Balayar Sadiq - Sığnə honi məktub
Dınyo ruşnə boçmi umri co nıbe.
Az ha vitim, dard mıku hiç co nıbe.
Az cəhəndım, ın orzu çı coni be,
Sığnə honi, ımru çımı dıl pure.
Nıznəym beşe ıştə inə ğarziku,
Sıpi mande vərəği dim tarsiku.
Çımı mijon livə oka arsiku,
Sığnə honi, ımru çımı dıl pure.
Dıli orzu zard be dıli rəfədə,
Umri xolçə randəj mande həvədə,
Ğıbo qəte, sıxan təsdə qəvədə,
Sığnə honi, ımru çımı dıl pure.
Umri kəco ve ovroje, ve liley,
In dınyo çı dardi-ğəmi ğəbiley,
Qləy əğıl umri çə sa bə hiley,
Sığnə honi, ımru çımı dıl pure.
Əv ki qləy sofə dılə əğıl be,
İ mışt orzu, i manqulu nəğıl be,
Çoknə be ki, qarde jıqo dəğıl be?
Sığnə honi, ımru çımı dıl pure.
Bə umri so mutə-mutə vay voydə,
Votdəm məvo, diykardəni ho voydə,
Əcəl mıni ğədəm-ğədəm onoydə,
Sığnə honi, ımru çımı dıl pure.
Bəxt bəmıro, az bə bəxti bəmedəm,
Dard-ğəmiku mıncır bedəm, təvedəm,
Çı sıxani bandonədə nəvedəm,
Sığnə honi, ımru çımı dıl pure.