Bırəs Əli!
İslami jə mıştbe Əli,
Peyğəmbəri peştbe Əli,
Har vırədə hıstbe Əli,
Bə xılx beşə mərəz Əli,
Haydə bəmə bırəs Əli.
Vay Xıdo din dasto şedə,
Bə hoc şəkəs ğəsto şedə,
Rost nıştə, du hastə şedə,
Ummət bedə zuərəs Əli,
Haydə bəmə bırəs Əli.
Həlol qine ,hərom çanəy,
Dardı-bəlo hejo kanəy,
Çəmə həni hınə anəy,
Boy əməni sərəs Əli,
Haydə bəmə bırəs Əli.
Əmə Mehdi bə çəşimon,
Əbəlfəzli dı kəşimon,
Həm vəşimon,həm təşimon,
Çəmə nalə bıməs Əli,
Haydə bəmə bırəs Əli.
İbni Ziyadon heve bən,
Yəzidon,Şumron ve-ve bən,
Əşəs- məşəson kəve bən,
Bəvon ni i perəs Əli,
Haydə bəmə bırəs Əli.
Sərost votə qəv ni lole,
Dırısti veyni fol-fole,
Qəvi okən sese,kole,
Nişe qılə ərəs Əli,
Haydə bəmə bırəs Əli.
Həmmə dılon əhand Əli,
Çe dı dınyo xıvand Əli,
Çe beçizon ovand Əli,
Har zıvoni dərəs Əli,
Haydə bəmə bırəs Əli.