Camal Lələzoə - Şeiron

Az Tolışim

Az Tolışim, Az Tolışim ,
Har canqədə ğalibim az.
Ha zərbəm çe bandi zuədəy,
Deştə hınon həlolim az.

Az Tolışim, az Tolışim ,
Çe bumiku səme ğıvvə.
Çe Xıdo eşğ dıldəy çımı,
Dışmenonı həmmə dıvə.

Az Tolışim, az Tolışim !
Otəşondə sutə Həşim !
Bəmı piərışte məkən,
Cəllodon tosniə kəşim.

Az Tolışim, Az Tolışim !

Dard

Ime jimoni dard, quzarani dard,
Bə zəhər peqardə peşomə ov, hard.

Ehtiyac bə kuçon tojnidə coni,
Bə rujon, bə şəvon çəşondə hani.

Bo i ğıç nuniro roonsə mandən,
Bo ğəpik-ğuruşi səpo pemandən.

Vədə bə dast omə mivə, şirə, nun,
Kulədə moəti vəzifə,ğanun.

  

Mandə ıştə eşği nuni arədə,
Diəkə, jeqo bızın ıştən yarədəy.

Ğəhre jıqo jimon ğəhre, dod, əmon !
Rədd bəbe, gin bəbe keynə ın zəmon !?

Tolışə balon

Nomını, şən-şehrət ve heste,
In dınyo hınəynə dast bəste,
Zoonı restəbəreste,
Səlom, Tolışə balon, hey !
Səlom, Tolışə balon, hey !

Şo xəbon ha yondə omedə,
Dastonon ko-bədə çamedə,
"Afərin" bə şımə damedə,
Səlom, Tolışə balon, hey !
Səlom, Tolışə balon, hey !

Vətəni ruşinə çəşişon !
Bə dınyo doroz bıə kəşişon !
Sərbozon, iqidon bəşişon !
Səlom, Tolışə balon, hey !
Səlom, Tolışə balon, hey !