Əli NASİR
Kande-kande
Çolon nığıl bedən hey kande-kande,
Dılon rüşin bedən vey hande-hande.
Zü ağıl nibədo, ağıl zü bədo,
Yarə çığıl jəbo i rüj lü bədo,
Çoli dənıskandoş ovış bü bədo,
Çolon nığıl bedən hey kande-kande.
Cüon bə i bışon xılon rü bəben,
Avon voş ebəkan vılon nü bəben,
Çəşon handənıbü dılon kü bəben,
Dılon rüşin bedən vey hande-hande.
Məholi rüşnə bən amoxtə merdon,
Çəvon har sıxan bə damon bə dardon,
Dard əve milləti yolon bıqardon,
Yolon əğıl bedən key mande-mande.
Vətən bo milləti jiye zəmonət,
Zıvon bə milləti Xıdo əmonət,
Ki bəştə zıvoni bıko xəyonət,
Bıvotı ğıymətış əy çande, çande?
Dardi yol ın darde moon bıqardon,
Iştə zıvonədə nozənıkardon-
Bo zande nımandon, kinə bımardon,
Ovəynə navədə səy rande-rande.
Milləton rişəsə mandən, bərk bedən,
Rəsdən, ozavzedən, çidən, qork bedən,
Pə tolış, mo tolış balon tırk bedən,
Tolışon kam bedən vey zande-zande.